اولوسلار آراسی عفو اورگوتو: ایران دا سئچکی قاباغی انسان حاقلاری دورومو پیسله شیب

 جمعه  ۲۵ بهمن ۱٣٨۷ -  ۱٣ فوريه ۲۰۰۹

اویرنجی: اولوسلار آراسی عفو اورگوتو سون اوچ آی عرضینده ایران دا انسان حاقلاری پوزونتولارینین چوخ آلماسی باره ده راپورت وئریب. راپورتدا سئچکی قاباغی آذربایجانلی لارا و ایرانین دیگر ائتنیک لرینه قارشی باسقی لارین، حبس لرین و ایشکنجه لرین آرتماسی باره ده معلومات وئریلیب. اویرنجی اوزل اولاراق بو راپورتون گیریش و آذربایجانلا باغلی اولان بولومو تقدیم ائدیر.

کئچن اوچ آیدا، اولوسلار آراسی عفو اورگوتو اساس‌سیز حبس‌لرین و ایزلمه‌ دالغا‌لارینین آرتماسی ایله باغلی معلومات‌لار آلمیش‌دیر. ایران حوکمتی باسقی لاری خصوصیله دینی و ائتنیک آزلیق جمعیت‌لری‌نین (بیرلیک‌لری‌نین) و طلبه‌لری‌نین عضو‌لرینه قارشی یؤنلتمیش‌دیر. سون اوچ آیدا اولوسلار آراسی عفو اورگوتو 220 انسانین حبسی، ایشکنجه سی و اعدامی ایله ایلگیلی معلومات الده ائدیب. بون‌دان علاوه، بیر نئچه قزئت باغلانمیش‌دیر و اینتئرنئت سایت‌لارینا گیریش محدودلاشدیریلمیش‌دیر. ایران حوکومتی 2009 دا کئچیریله جک جمهورباشقانلیغی سئچیمینده مخالف و منتقد سس لری سوسدورماق نیتینده دیر. اولوسلار آراسی عفو اورگوتو دئییرکی ایران دولتی بوتون منتقد و مخالف گوجلره آزادجاسینا دانیشماق و ایفاده اوزگورلویو حاققی تانیمالی دیر. اولوسلار آراسی عفو اورگوتو یایدیغی سندلره گوره ایران دولتی غیر قانونی عمل لری ایله ائتنیک آزلیقلارین ناراحاتلیغینا سبب اولموش و اونلاری محدودلاشدیرمیش دیر.

اولوسلار آراسی عفو اورگوتو بئله جزالارین بیتیرلمه سی و اینامین، ایفاده‌نین، ییغینجاغین وبیرلیک لرین حقوق‌لارینی دستکلمک اوچون ایران حاکمیت اورقان‌لارینا مراجعت ائدیر. ایران دئولتی غیر قانونی باسقی لاری قالدیرمالی دیر و اولوسلار آراسی قانون لارا تابع اولاراق محدودیت لری آرادان گوتورمه لی دیر. اولوسلار آراسی عفو اورگوتو  ویجدان دوستاغی اولانلارین ایفاده اوزگورلویونه دایالی حقوقلارینا گوره درحال آزادلیغا بوراخیلماسین طلب ائدیر. بوتون حبس ده اولانلار ایشگنجه‌دن و یا باشقا آمان‌سیزلیق لار‌دان قورونما‌لی‌دیرلار. اولوسلار آراسی عفو اورگوتو دئییر کی 30 ایل ایران انقلابیندان کئچسه ده بو اورگوتون یئتکی لی لرینه ایرانا سفر ایجازه سی وئریلمه ییب.

آذربایجان‌لی‌لار

اؤتن ایل نویابرین 13-ده تئهرانین شهید رجائی اونیوئرسیتئتی‌نین معلمی عبدالله عباسی جاوان و اونون باجی‌سی اوغلو حسین حسینی گونئی آذربایجان مشروطه حرکاتینین لیدئری ستتارخانین ایلدؤنومو عرفه‌سینده اونون مزاری باشیندا حبس اولونوب‌لار. عائله‌لری‌نین اونلار باره‌سینده هئچ بیر معلوماتی یوخ‌دور. والیدئین‌لری یالنیز میللی فعال‌لار نویابرین 23-ده تئهران‌داکی ائوین حبس‌خاناسینین 209-جو بندینه کؤچورولدوک‌دن سونرا خبر توتوب‌لار. حسین حسینی ایسه بو ایل یانوارین 21-ده گیروو موقابیلینده سربست بوراخیلیب. آنجاق عبدالله عباسی جاوانین عائله عضو‌لریله گؤروشه و وکیل توتماغا ایجازه وئریلمیر. میللی فعال 2007-جی ایلده ده حبس اولونوب و 130 گون تجریدخانادا ساخلانیلیب. او، “دؤولت‌چی‌لیک علئیهینه تبلیغات آپارماق”دا و پان تورکیزمده گوناهلاندیریلیب. بیاناتدا قئید اولونور کی، بو ایل یانوارین 14-ده گونئی آزربایجانین اورمو شهرین‌دکی قیزیل خنه‌یه “خانقاه-سرخ” کندینده باش وئرن توققوشمادا حبس ائدیلن 30-دان چوخ اینسانین 18-نین آدی معلوم‌دور. بونلار بارزاد نظامی افشار، میقداد نظامی افشار، سعید جعفرپور، محمد صمدزاده، بهرام قولوزاده، نادعلی قولوزاده، نادعلی علیپور، معراج علیپور، حیدر علیپور، سولیمان ابراهیم‌زاده، ناصر قولوزاده، اکبر رستمی، ایسکندر اصلانی، آللاه وئردی اصلانی، فرامرز جعفری، محمد جعفری، نقی-آ و داوود-ش-دیر: “ساکین‌لر یئر آلتی سو قایناق‌لارینین صنایع ایستیفاده‌سی اوچون یؤنلدیلمه‌سینه اعتراض علامتی اولا‌راق اورمو-سالماس یولونو باغلاییب‌لار. آنجاق اونلارلا پولیس گؤزیاشاردیجی گاز و سلاحلا دینج نوماییش‌چی‌لره هوجوم چکه‌رک اونلارا آتش آچیب: “پولیس همچینین کندلی‌لره عاید اولان آوتوموبیل‌لری زده‌له‌ییب، قئیدیات نؤمره‌لرینی موصا‌دیره ائدیب. 30-دان آرتیق کند ساکینی توتولوب. گؤز آلتینا آلینان‌لار آراسیندا یارا‌لی‌لار دا وار، آنجاق ایلک ساعت‌لاردا اونلار اوچون معا‌لیجه ایمکان‌لاری یارادیلماییب. یارا‌لی‌لار 5-6 ساعت سونرا آغیر قاناخما‌لارینا گؤره، اورمونو ایمام خمئینی خسته‌خاناسینا آپاریلیب‌لار. توتولان‌لار ایشگنجه اولونماقلا سورغو-سوالا چکیلیب و اون گونون ایچری‌سینده گیروو موقابیلینده سربست بوراخیلیب‌لار. آنجاق اونلار حکومته قارشی عصیان و محکمه حؤکمونه حؤرمت‌سیزلیک ائتمکده گوناهلاندیریلیب و نوشین شهر (اورمیانین یاخینلیغیندا) محکمه‌سینده موحاکیمه اولونوب‌لار. محکمه‌نین قرارییلا 11 نفره 3 ایل، 1 نفره 2 ایل، 3 نفره 6 آی 2 گون حبس جزاسی وئریلیب. قالان 6 شخص ایسه 2 میلیون ریال جریمه ائدیلیب‌لر. گوناهلان‌دیریلان 10-دان چوخ شخص حبس‌دن باشقا، 74 شاللاق جزاسینا دا لاییق گؤرولوب”.

بو راپورت ایلک دفعه اویرنجی طرفینده ن یاینلانیر.