ایراندا گونئی آذربایجانلیلارا قارشی محکمهلر داوام ائدیر
جمعه ۱۱ بهمن ۱٣٨۷ - ٣۰ ژانويه ۲۰۰۹
آمئریکانین سسی: اردبیلدکی منبعلرین یایدیغی معلوماتلارا گؤره، 5 آذربایجانلی فعال - حسین حسینی، ودود سعادتی، بهروز علیزاده، رحیم غلامی و اردشیر کریمی اردبیلین ایسلام اینقیلابی محکمهسینه چاغیریلیب. فعاللاری مدافعه ائتمه یی اوزرینه گؤتورن آذربایجانلی وکیل سید محمدرضا فقیهینین بیلدیردیگینه گؤره، اونون مووککیللری ایرانین جینایت مجللهسینین "دؤولتچیلییه قارشی تبلیغات" ماددهسی ایله اتهام اولونورلار. وکیلین بیلدیردیگینه گؤره، محکمه پروسئسینه اردبیلین ایسلام اینقیلابی محکمهسینین 1-جی شعبهسینی رئیسی حاکم حسنزاده باشچیلیق ائدیر. ودود سعادتی، بهروز علیزاده، رحیم غلامی و اردشیر کریمی تخمینن بیر ایل اؤنجه تهلوکهسیزلیک اورقانلاری طرفیندن حبس اولونموش، 20 گون ساخلاندیقدان سونرا ضامینه بوراخیلمیشلار. محکمهیه چاغیریلان حسین حسینی ایسه بیر هفته اؤنجه ضامینه بوراخیلیب.
جناب حسینی، اؤتن ایل سئنتیابرین 14-ده تئهراندا ستارخانین مزاری اوستونده کئچیریلن آنیم مراسیمی زامانی بیر نئچه مراسیم ایشتیراکچیسی ایله بیرلیکده حبس اولونموشدو. همین مراسیم زامانی حبس ائدیلن تهرانین رجائی اونیوئرسیتئتینین آذربایجانلی معلمی عبدالله عباسی هلهده "ائوین" حبسخاناسینین 209 سایلی تجریدخاناسیندا ساخلانیلیر.
تبریزدکی منبعلر ایسه بیلدیریر کی، حبسده اولان تبریزلی فعال، وحید شیخ بیگلو ایکینجی دفعه اولاراق ایسلام اینقیلابی محکمهسینده حاکم قارشیسینا چیخاریلیب. یانوارین 27-ده کئچیریلن محکمه ایجلاسی دا داها اؤنجکی ایجلاسدا اولدوغو کیمی هر هانسی قرار وئریلمهدن باشا چاتیب.
فعالین قارداشینا ایستینادن یاییلان خبرلره گؤره ، وحید شیخبیلینین عائلهسینه محکمه رسمیلری طرفیندن بیلدیریلیب کی، ایسلام اینقیلابی تریبونالینین موتتهیم له باغلی آراشدیرمالاری باشا چاتمادیغیندان هلهلیک اونون حاقیندا قرار قبول ائتمک مومکون دئییلدیر.
بیر آی اؤنجه، تبریزدکی منزیلینین اؤنوندن اوغورلانان و داها سونرا اطلاعات طرفیندن توتوقلاندیغی معلوم اولان، تبریزین اؤزل اونیوئرسیتئتینین طلبهسی وحید شیخبیلینین یاخینلاری محکمه ایجلاسی زامان اونون مووققتی ضامینه بوراخیلماسینی ریجا ائدیبلر. آنجاق حاکم حبس قطعی-ایمکان تدبیرینی دییشمکدن ایمتیناع ائدیب./اویرنجی
نظر دهید